Tekst og foto: Vidar Sogge

Hermannhytta på Austre Nordmarka i Surnadal er ferdig restaurert og klar til å a imot til saman 11 overnattingsturistar.

Kristiansund og Nordmøre turistforening kjøpte Hermannhytta hausten 2002, og ho skal danne bindeleddet mellom Fjordruta og Trollheimen. Næraste hytta i Fjordruta er Grytbakksetra. Stigen mellom desse hyttene reknar turistforeninga med blir ferdig merka rundt midten av juli.
Som dei fleste hyttene på Fjordruta er også Hermannhytta  sjølvbetjent, dvs. at det einaste du treng å ta med på turen er sovepose eller lakenpose. Hytta er ulåst, og du finn mat, kjøkkenutstyr, omn og gassbrennar for å koke maten. Betalinga skjer kontant eller ved fullmakt.
Førebels kjem du enklast til Hermannhytta når du køyrer til Moen i Surnadal og parkerer bilen 300 meter aust for kyrkja. Derifra er det merka sti heilt fram. Turen tek om lag l time med vanleg gange.   
Hovudhytta vart ferdig alt til påske. Fire køyer fordelte på to soverom gjev 6 overnattingsplassar. I tillegg er det plass til ein person på sofaen i stova.

Annekset har gjennomgått sto­re forandringar i løpet av våren. Her har turistforeninga fått eit soverom med overnattingsplass til 4 personar, do, redskapsrom og skott. Det er stort sett berre murane som står igjen av det gamle bygget.

Som vanleg i KNT har alt ar­beid vore utført på dugnad, og 16 personar har til saman utført 92 dagsverk, ofte frå 7 om morgonen til 9 om kvelden. Tilsynet for hytta, Jan Nordvik og Vidar Sogge, vil takka alle deltakarane for den enorme innsatsen, og håpar, at mange, både bygdefolk og tu­ristar, vil stikke innom og slappe av på den fine hytta.