Fellestur i Innerdalen

Kvar fer du dersom du ønskjer ein skitur i storslagen natur og i godt lag der du kan nyte det gode livet når du når ned til hytta? Ja, da blir du med Kristiansund og Nordmøre Turistforening til Innerdalshytta for å gå Kringelhøa rundt.

Fredag 18. mars møtes vi på parkeringsplassen på Nerdal. Dei fleste kjente fjes. Etter omlag ein time er vi framme på Innerdalshytta. Fullmånen kikar fram og lurar på kva folk dette er.

På hytta blir vi møtt av Torill. Etter noko å drikke på blir det servert kjøttsuppe. I år som før smakar suppa framfrå. Turleiarane orienterer om skituren neste dag. Knt har sendt sine beste folk, og Per Gaupseth og Terje Møst har hatt ansvaret for denne turen i mange år. Det blir tidleg ro på hytta. Deltakarane har respekt for turen som ventar.

Laurdag! Du verden, sol og finver. Kjekt å sjå at alt ligg til rette for å gå på skitur. Presis kl 9 legg vi i veg med feller under skia. Vi går opp lia til Renndalen og Renndalsvatnet. Turleiarane set ein fin fart, ikkje så fort, men det går jamt oppover. Alle er gode på ski og i brukbar form.

Den tyngste etappen går på kryss og tvers opp kleiva til demninga på Langvatnet. Det går unna og vi er oppe knapt 3 timar etter at vi starta frå hytta.

Turen austover Langvatnet går som ein draum og vi rundar fjellet Kringelhøa. Her møter vi 4 elgar på vandring. Vi hadde ikkje venta å sjå elg så høgt til fjell, men kanskje er dei på veg til eit anna dalføre, ikkje veit eg. Så langt har det vore ein liten vindtrekk, men her løyar vinden og vi legg inn ei ekstra pause i solsteika.

På med skia att og bortover mot Innerdalsporten. Det er artig å renne når føret er så bra. Litt fokksnø er det, men ikkje is slik det kan vera så høgt til fjells. Vi kosar oss ned bakkane.  Ikkje fritt for at konkurranseinstinktet vaknar hos enkelte. Med litt knall og fall kjem vi ned til Falesetra.

Med så lett og fint skiføret går siste økta ned  til Innerdalshytta raskt unna. Totalt 7,5 timar etter at vi starta.  På hytta har Torill varma opp badstova. men først er det ei pils på trappa. Det smaka det!

Kroppen får godt stell. Skikkeleg vask utvendig og god drikke innvendig. Det er tullprat og latter og folk kosar seg. Det er kjekt å vera konge, om ikkje anna berre for eit par timar.  Til middag er det viltgryte og Torill skuffar ikkje.

KNT har hatt denne turen på turprogrammet i mange år. Kanskje var dette 24. gongen. I fjor stod turen ikkje i turheftet, til masive protestar frå folkehavet.  Turkomitten gjer noko ikkje den tabben omatt. Denne turen er Fellestur de Lux, Fellestur GTI og Fellestur Framifrå, alt på ein gong. Eller som ein av deltakarane sa det Fellestur Stjerneklasse 6.

Vi tek på heimveg vel vitande om at ta her har vore kjøle bra! Vi møtest om eit år , kanskje til Jubileumstur Kringelhøa rundt. Takk til Per og Terje for sikker og god turleiing. Takk til oss alle som gjorde turen!

Følgjande var med på turen: Håvard Johannsen, Marit Gjertsen, Eva Sæterøy, Ola Wullum, Jorunn Langhelle, Finn Nikolaisen, Heidi Leonardsen, Arve Olsen, Randi Loe, Olav Loe, Inger Johanne Bjørnå, Are Andre Olsen, Wenche Greve, Per Gaupseth (turleiar) og Terje Møst (turleiar)

Referat og bilder Ola L. Wullum