|
Flessa – Trodalen – Bøkleppen
Laurdag 28. mai var 45 personar med på fellesturen frå Flessa til Bøkleppen. Turleiar var Egil Djupvik. Bernt Gudrunson Bøe var med som guide og hadde mykje interessant lokalhistorie å fortelje. Ved starten i Flessa fekk deltakarane høyre litt om garden, om ”flesa” som er bakgrunn for namnet og om ”Flessestrandens skole”, der det snøa inn gjennom glaset og mjølka fraus… Via Jutvika gjekk turen til Båtvika, der det i si tid var trafikknutepunkt, handelsstad og gjestgiveri. Mura vegar og tufter etter hus og fjøs vitnar om arbeid og busetnad. Og enno står stabburet att – om enn i skrøpeleg stand. Vi fekk høyre den tragiske historia frå 1909, da ein båt kollsigla og familiefaren i Båtvika omkom. Ei ung enkje sat att med 3 små barn, det minste skulle døypast helga etter ulykka. På Båtvikneset kunne vi sjå den eine av fleire gravhaugar - visstnok frå bronsealderen. Komne fram til Trodalen vart det tid for matpause. Guiden fortalte den dramatiske historia om Mannbjønnen som herja i traktene her på 1770-talet og som drap gardmannen like ved husa. I steinbrotet nede ved sjøen dreiv dei fram skifer til m.a. takstein. På turen vidare passerte vi den bratte setervegen som går frå Grava opp til Gravasetra - der den 15-årige seterjenta bar ned mjølka i to bøtter - pluss i mjølkekoffert på ryggen! Åttåt gardane vi såg, har det på strekninga også funnest husmannsplassar som ikkje er nemnt i bygdeboka, m.a. ved Trodalen – og vi stansa ved tuftene etter bygningar på Stølen ovafor Breivika. Turen var krydra med artige og dramatiske historier om folk som har i budd i området. Dei mange terrengnamna vitnar også om liv og hendingar i gamle dagar. Vel framme i Bøkleppen etter fire timars historievandring kunne vi takke guide og turleiar for følgjet på ein interessant og triveleg tur. Kirsten B. Bøe, referent
|
||||||||||||||||||||||||||||||||||
|
|
||||||||
 |
||||||||
|
|
||||||||
|